Þorbjörg og ruglið mitt!

Sumarið á enda!

Fri, 26 Aug 2011 21:34:03 GMT

Þá er þessu sumri að ljúka. Við tekur skóli, kennsla og helgarvinna.

Búin að taka þátt í nokkrum mótum í sumar, skambyssu og riffil og gengið nokkuð vel miðað við fyrsta sumarið, nú er að ná betri árangri og toppa þetta næsta sumar :)

Já og ég er búin að kaupa mér vespu (bensín) og búin að rúnta um á henni núna í vikunni og gengur bara vel.

En þá held ég að ég láti þessu bloggi lokið og skelli mér út í bæ að hitta nýnema HA á Pósthúsbarnum ;)

Sumarið 2011

Thu, 16 Jun 2011 20:32:19 GMT

Svona til að hafa smá tilbreytingu í blogginu ;)

Sumarið 2011 (eða það sem á að heita sumar!) fer í vinnu í Tiger og einhverjar skotkeppnir og veiðimót :)

Síðan tekur við áframhaldandi skólaseta hjá mér næsta vetur en ég ætla að halda áfram í skóla og byrja á M.ed námi næsta vetur.

Jæja nóg í bili

e.s. mamma til hamingju með afmælið :D

24. mars 2011

Thu, 24 Mar 2011 17:56:51 GMT

Eitt ár frá síðustu færslu, þar sem ég var að tala um hve lítið væri eftir af skólanum og núna er ennþá minna eftir. Ég er á fullu að reyna að vinna í 50% ritgerð í Heimspeki menntunar sem á að skila um helgina og þá tekur við undirbúningur fyrir lokapróf í líffræði sem er 5. apríl á meðan maður reynir að hjakkast áfram í lokaritgerðinni sem á að skila í lok apríl. Já þessu er að verða lokið, ég er að verða búin með þrjú ár í háskóla!
Þá tekur við hvað svo? Á maður að reyna að fá vinnu eða halda áfram í skóla og fara í meistaranám strax? Ég er allavega búin að skila inn umsókn í áframhaldandi nám við HA og svo er að sjá hvernig staðan verður á vinnumarkaðnum næsta skólaár.

En Já að öðru ég er búin að vera rosalega dugleg í ræktinni frá áramótum og er búin að ná fyrsta markmiðinu sem ég setti mér (eða alveg að ná því) sem var að fara niður í næsta "tug" á vigtinni :D Var í morgun x0,0 kg ;)
Nú er að halda áfram í sama pakka og reyna að nálgast næsta tug fyrir sumarið.

Held ég láti þetta duga núna og aldrei að vita nema maður fari að koma einhverju hér inn fyrr en að ári ;)

Ef einhver les þetta þá má hinn sami gjarnan setja nafnið sitt við í athugasemd, bara svona upp á gamanið fyrir mig, verður þá kanski hvattning fyrir mig til að taka upp bloggskrif (ekki er ég beint að eiða orkunni í önnur skrif eftir lok apríl ;) )

Tíminn flýgur!

Wed, 24 Mar 2010 08:46:19 GMT

Það er búið að vera allt of mikið að gera í þessum blessaða skóla mínum.
Þess vegna er ennþá betra þegar maður fær viðurkenningu fyrir vinnuframlagið og fær verkefni til baka upp á 9 og svo upp á 10 :D
Núna fer þó að styttast í þessu hjá mér og verkefnunum fækkar jafnt og þétt, ennþá eru þó eftir tvö mjög stór verkefni, annað 50% og hitt 60%, svo fer ég í tvö próf (100% og 40%). Ef allt gengur vel að þá verð ég komin í sumarfrí 7.maí :D og þá er stefnan á að gera eitthvað skemmtilegt ;)

Komin heim

Mon, 18 Jan 2010 22:07:57 GMT

Ylva Rún

Mon, 18 Jan 2010 21:30:22 GMT

17. janúar var það heillin

Sun, 17 Jan 2010 17:44:41 GMT

Núna er ég orðin stóra frænka :D

Hafði ekki rétt fyrir mér með strákinn, þar sem í heiminn kom lítil dama.

Innilegar hamingjuóskir til littla bró og Maríu :)

Uppfært: daman kom í heiminn 17:20, 13 merkur og 52 cm

Afmæliskveðjur

Fri, 15 Jan 2010 19:07:07 GMT

Í dag á Einar frændi afmæli og á morgun Óttar, þetta eru stóri og littli bræður pabba :D

Svo á morgun á littli bróðir minn afmæli.

Sendi afmæliskveðjur til ykkar allra.

Fyrsti skóladagurinn (8)

Tue, 12 Jan 2010 11:28:13 GMT

Í gær átti að vera fyrsti skóladagurinn og ég mætti eldhress eftir að hafa farið í Bakaríið við brúna með Hönnu, en þegar við komum var enginn kennari kominn. Svo leið og beið og ekki kom kennarinn, þegar 15 mínútur voru liðnar af tímanum ákvað ég að fara fram á skrifstofu og kanna málið. Þegar hringt var í kennarann sem var upp á skrifstofu í rólegheitunum að undirbúa sig fyrir kennslu annarinnar, fékk hún nánast taugaáfall, því hún hélt að tíminn væri ekki fyrr en í næstu viku og var því ekki tilbúin. En hún kom og ræddi aðeins við okkur og svo fórum við heim. Þannig að í raun verður ekki fyrsti skóladagurinn minn eftir jól fyrr en á morgun. En þá þarf ég að mæta kl.8 og það verður munur að þurfa að vera tilbúin og sjálf búin að borða morgunmat fyrir kl.8 þegar ég fer með stelpurnar í skólann!

En þá er bara að fara fyrr að sofa í kvöld en í gær, enda er ég gjörsamlega að leka niður og nenni ekki neinu.

Ég byrjaði áðan á að brytja niður jólatréð og er búin að setja greinar í einn pappakassa en það sér varla á trénu !

Svo er ég að verða búin með heimatilbúnugjafirnar sem ég lofaði reyndar að koma frá mér í fyrradag og í gær, en þetta er að koma, ég þarf að pakka annarri inn og setja í póst, hin verður til vonandi á morgun, fer eftir því hvað ég verð dugleg í dag og kvöld.

Jæja held ég láti þessa rommsu duga í bili.

Já, ég þarf að halda úti bloggi í einum áfanganum í skólanum, spurning hvernig það kemur til með að ganga!

Vinnuútilega í Fálkafelli (7)

Tue, 12 Jan 2010 11:20:35 GMT

Á laugardaginn fór ég í vinnuútilegu í Fálkafelli, mæting var við hitaveituskúrana kl.12 en þar sem Þórður þurfti að vinna á laugardagsmorguninn og ég ekki með greiðan aðgang að pössun, mætti ég ekki fyrr en kl.12:30

Þegar ég kom uppeftir var þónokkur vindur og þegar ég var búin að ná hinum sem voru bara rétt á undan mér, þurfti maður að stoppa reglulega til að ná andanum og svo þegar ofar kom, mátti maður hafa sig allan við að halda sér á réttri leið vegna hliðarvinds.
Aukakílóin komu að góðum notum við að halda sér á jörðinni ;)

En svo komum við uppeftir og þá fór ég ásamt Arnóri í að kveikja upp, gaman að komast í það eftir langa pásu :D

Svo þegar hiti og næring var kominn í liðið var farið að undirbúa starfið fram á vor.

Í kvöldmat var boðið upp á hamborgara og í eftirmat, kekkjaskyr og royal-súkkulaði-búðing og þeyttan rjóma :D

Svo var kvöldvaka, en því miður komu engir gestir (a.m.k. ekki sýnilegir) en við vorum með skemmtiatriði og sungum þau lög sem verða lög mánaðarins fram á vor. :D

Svo var boðið upp á kakó og spilað í framhaldi af því, ég prófaði nýtt spil sem heitir: ?

Svo var farið ofan í poka.

Sunnudagurinn fór í að ganga frá og rölt niðureftir, ekki gott færi, það var hláka svo það var vel blautt undir snjónum og þar sem hann hafði tekið upp var vel blautt í leðjunni :s

En heim komst ég heil á húfi eftir frábæra helgi með frábæru fólki.

Föstudagur (6)

Tue, 12 Jan 2010 11:13:03 GMT

Ég fór með stelpurnar á brennuna á þrettándanum eftir að hafa borðað hangikjöt hjá mömmu :D

Í hádeginu á fimmtudaginn fór ég í opin tíma í Gravity á Bjargi, það var fínt og stefnan er á að mæta í þá tíma í vetur eins og hægt er.

Föstudagurinn 8. janúar. Blak kl.16, mættir 8, sem var alveg frábært, góðir leikir spilaðir og tekið vel á því.

Þrettándinn (5)

Wed, 06 Jan 2010 15:47:04 GMT

Í dag er síðasti dagur jóla og þá þarf að fara í að setja jólaskraut ofan í kassa og ég sem var bara að taka það síðasta upp í gærkvöldi! En það var reyndar búið að vera í kassa frá því 2001 (miðað við dagsetninguna á dagblaðinu sem var í kassanum!).

Núna er ég búin að ná í nokkra bókakassa niður í kjallara og þær eru flestar óskaddaðar eftir veruna þar en sumar eru með smávægilegum rakaskemdum eða blettum sem vonandi ná að hverfa með tímanum eða minnka :s

Þórður fór og náði í (vonandi) restina af spítunum sem fara í búrið og núna er að taka dótið fram sem var sett inn fyrir jól svo hægt verði að saga og skrúfa þetta á sinn stað :D

Svo þarf ég víst að grunna og mála og lakka svo hægt verði að setja hillurnar á sinn stað, en þá get ég farið að ganga frá meiru dóti í hillur :D :haha:

Já, ég fór út á Bjarg í gær og rölti/skokkaði 2 km og hjólaði 1 km. Í morgun fór ég síðan og hjólaði í 25 mín í rólegheitunum rúma 8 km á meðan ég las í einni skólabók ;)
Maður notar jú tímann eins vel og hægt er, en svo kemur maður heim og gerir ekkert af viti:!:

Já ég þarf ekki að mæta í skólann á morgun eins og upphaflega stundarskráin gerði ráð fyrir, heldur á mánudaginn :)
En fyrsta kennsluáætlunin er komin og fínt að fara að koma sér í gírinn, læra áður en "skilafrestur er á morgun" 8|

Já og ég fór í bíó í gær á AVATAR með Maríu, fín mynd.

Og að lokum vil ég óska afmælisbarninu sem er orðið forráða til hamingju með afmælið.

Raunveruleikinn tekinn við (4)

Tue, 05 Jan 2010 08:27:20 GMT

Í morgun var fyrsti skóladagurinn á nýju ári hjá Sóleyju og gekk vonum framar að koma henni á fætur og í skólann. Sesselja var ef einhver var með smá þreytu erfiðleika, hún er alltaf sú sem dregur hina á fætur. Eins og í gær, var hún ein greiið á fótum að gera sitt til að koma mér og systur sinni á fætur!

En núna er fyrsti nuddtíminn á nýju ári. Vona að bíllinn fari í gang, aftur komið -12°C :(

Ræktin (3)

Mon, 04 Jan 2010 14:15:13 GMT

Lét verða af því í morgun að skreppa út á Bjarg og rölta rúma 2 km á brettinu.
Stelpurnar voru í barnapössuninni á meðan (hafði ekki nema 30 mín, vegna opnunartímans þar).

Svo er nudd í fyrramálið, og spurning um að skella sér úteftir aftur og rölta smá meira?

Jæja, bíllinn fór í gang í morgun enda ekki nema -4°C í morgun og hann mun samvinnuþýðari ;)

Veður (2)

Sun, 03 Jan 2010 12:46:10 GMT

Það er aðeins of kalt fyrir bílinn, gátum ekki sett hann í gang í gær og ekki útlit fyrir að það verði neitt auðveldara í dag!

-15°C eru aðeins og lítið fyrir hann!